FOL MÚSICA é un selo especializado en música galega que forma parte de BOA.

Alá polo ano 1992 decidimos crear un selo discográfico e comezamos a distribuír música alternativa e interesante de todo o mundo. Eramos uns mozos case sen experiencia no ámbito da música e da empresa, pero con moitas ganas e ilusións. Así naceu BOA, un nome galego que definía a nosa paixón pola música.

Aínda que xa editabamos discos galegos con anterioridade, en 1995 creamos DO FOL EDICIÓNS, un selo irmán de BOA dedicado á música galega de raíz, no máis amplo sentido da palabra.

Lanzamos os primeiros discos de Chouteira, Os Cempés e Berrogüetto, tres artistas novos por entón que ían revolucionar a música galega. Con eles chegaron anos de esplendor creativo para a nosa música. Xa choveu dabondo desde aquela. En todos estes anos fomos creando un interesante catálogo, con discos marabillosos e preciosa música. Pasado algún tempo renomeamos o noso apelativo orixinal e creamos un novo logotipo. Así naceu FOL MÚSICA, un selo 100% dedicado á música galega.

As nosas actividades céntranse en editar, producir e distribuír música. Tamén organizamos eventos e concertos, temos longa experiencia e coñecemento nestas áreas. Somos profesionais da música, pero tamén temos valores de transparencia, responsabilidade, ética, cordialidade: valores que queremos afianzar no tempo.

Queremos mostrar a nosa singularidade cultural e social únicas. A lingua galega é un dos baluartes do noso proxecto, un ben apreciado neste mundo globalizado. Gustamos de editar propostas artísticas interesantes e que teñen algo que dicir: novos artistas aos que queremos apoiar, e artistas consagrados que precisan unha plataforma de comercialización e promoción axeitada.

A nosa misión é conseguir a máxima difusión destes traballos. Temos distribución en moitos países do mundo, estamos presentes en todas as plataformas existentes en Internet.

Seguiremos editando traballos marabillosos e únicos. A creatividade non ten límites e o futuro está cheo de sorpresas emocionantes.

ARTISTAS:
—Uxía
—Budiño
—Mercedes Peón
—Rodrigo Romaní
—Sondeseu
—Sés
—Radio Cos
—Magín Blanco
—Sérgio Tannus
—Leilía
—Talabarte
—Doa
—Banda Crebinsky
—A Banda das Crechas
—Fuxan os Ventos
—Os Cempés
—Ialma Malvela
—Pancho Álvarez
—Cristina Pato e Rosa Cedrón "Soas"