E xa van dez! Celebramos a décima entrega de Directos Xacobeo’21 por partida dobre, cunha sala en Vigo en outra na veciña Ourense. Lembrade que as actuacións están divididas en capítulos (un por canción). Deste xeito, resulta máis sinxelo tanto acceder a calquera parte da gravación como saber exactamente que tema escoitamos en cada momento con só botarlle unha ollada á barra de progreso. Alén diso, no propio vídeo, aparece un rótulo co título ao comezo de cada tema.

SINATRA CÓCTEL BAR

En 2016, José Argibay, Juanjo Figueroa, Miguel Ojea e Sergio Argibay, catro hostaleiros do Casco Vello de Vigo, xuntáronse para dar vida a un novo proxecto cuxo eixo sería a música e un servizo de cócteles da man de profesionais. Pesa a súa corta idade, o Sinatra Cóctel Bar é xa un local con historia e un símbolo da cidade, grazas a estes trazos de identidade. A súa estética clásica, propia dun local dos anos 50 —piano incluído— farán imposible non querer entrar e desfrutar dun bo concerto na rúa Fermín Penzol.

Dirección: Rúa Fermín Penzol, 6, 36202 Vigo (Pontevedra)

Facebook: https://www.facebook.com/SinatraCoctelBarVigo

THE LÁKAZANS

Perfil en galiciantunes

O bar Bloody Mary ten gran parte da culpa de que hoxe en día existan estes «folgazáns», xa que esta formación nace en 2010 de xeito casual, logo de coincidir os seus membros en varias jams en Santiago e xurdir a maxia entre eles. Comezan coma un grupo de versións, adaptando clásicos do blues, o soul, o country e o rock ’n’ roll, mais tras mollarse os pés, mergúllanse por completo na música compoñendo os seus propios temas. Polo de agora teñen tres traballos no seu haber, sendo o máis recente Sandwina (dotbeat!, 2017), unha homenaxe á circense Kate Brumbwach, «a muller máis forte da historia», e un canto á forza de todas as mulleres.

ELADIO Y LOS SERES QUERIDOS

Perfil en galiciantunes | Entrevista en galiciantunes

Con máis de 15 anos de carreira e unha morea de álbums publicados, Eladio y los Seres Queridos ten motivos de sobra para ser un dos grupos referente no panorama musical actual. O grupo confórmano David Outumuro (batería), Eladio Santos (voz, guitarra), Marcos Vázquez (sintes, piano) e Oscar «Uka» Durán(baixo), e as súas melodías viaxan desde o pop clásico ata o folk, realizando paradas tamén no indie e o rock, mais acadando unha sonoridade recoñecible e estable, que podemos apreciar no seu último traballo, Academia (2020). Ao longo da súa traxectoria foron galardoados con multitude de premios, como o Premio Martín Códax da Música a Mellor Grupo Indie Pop en 2013 e 2018.

BEST BOY

Ángel Sánchez e Lucas Fernández son Best Boy, un dúo que busca poñer o foco no que de verdade importa, a canción. Para isto exploran diversas influencias, tinguindo as súas composicións de blue grass, folk pop, soul e jazz, entre outros, pero acadando un son sinxelo e lixeiro que evoca unha atmosfera positivista e colorida. O grupo converteuse nunha auténtica revelación da música galega, acadando un gran éxito, as súas letras xa soaron en diversos festivais como o Atlantic Fest ou o Festival de la Luz.

CAFÉ TEATRO BAJO 5

Poder contar cun local onde se reúnan boa música en vivo, boas tapas e bo ambiente é un luxo, e senón que llo pregunten aos veciños e veciñas do Barco de Valdeorras, posto que esta combinación gañadora define á perfección ao Café Teatro Bajo 5. Situado na Praza do Sagrado, a súa estética limpa e moderna convida a entrar, sentarse e desfrutar. Pero non só da música, o Café tamén acolleu, por exemplo, a exposición do artista Iván Prieto, demostrando deste xeito que aposta por todo tipo de arte. Ademais, atópase moi pretiño do fermoso río Sil, unha razón máis para visitar e disfrutar do pobo!

Dirección: Praza do Sagrado, 5, 32300 O Barco de Valdeorras (Ourense)

Facebook: https://www.facebook.com/Cafeteatrobajo5/

LA CASA DE LOS INGLESES

Perfil en galiciantunes

Abríndose oco entre a gran matogueira competitiva que é a escena musical nacional do indie pop aparece esta banda pontevedresa que deu os seus primeiros pasos en 2012. E desde entón xa tocaron por toda Galicia, ademais de publicar dous álbums, o EP Punto de Partida (2015) e o LP La Tierra es Plana (2018), co que fixeron unha xira de presentación por todo o territorio estatal. A súa fórmula foxe de arranxos complexos, eles apórtannos melodías sinxelas, lixeiras e directas; un sopro de aire fresco que chega en forma de cancións pop, ás veces indie. Esta combinación valeulles para acadar varios premios en diversos concursos, como o Liberty Music Play ou o Fest 2015.

PRESUMIDO

Perfil en galiciantunes | Entrevista en galiciantunes

Nacho Dafonte e Tarci Ávila presentaban en 2013 ‘Ahora Mejor’ e desde entón, como se dun vaticinio se tratara, non pararon de rebentar o panorama musical. O dúo vigués presentou unha longa cola de traballos durante a súa traxectoria, todos eles en forma de synth pop 2.0. Un chisco de retro dos 80, máis a exploración de diversos territorios musicais propios de artistas como Depeche Mode ou Daft Punk, levounos a atopar un estilo propio e innovador. Nos seus concertos gustaban de combinar a súa música con xogos de luces e proxeccións, creando unha experiencia totalmente inmersiva. Oito anos despois, Presumido despedíase como unha das grandes promesas baixo a premisa da autoedición, o talento e a creatividade; oito anos de composicións, de directos e de momentos imborrables.