ARRINCA SONEMERXENTE 2024
A Xunta de Galicia, a través da Axencia Galega das Industrias Culturais e coa Fundación Paideia Galiza como entidade colaboradora, vén de poñer en marcha a segunda edición de SONEMERXENTE, a aceleradora musical coa que busca impulsar o despegue de carreiras de novos talentos con especial potencial de proxección.
Concibido como un programa integral de aceleración musical, SONEMERXENTE acolle 12 novos proxectos e, seguindo a estrutura da entrega anterior, consta de dúas fases. A primeira delas consiste nunha serie de consultarías individualizadas e grupais, tanto presenciais como telemáticas, que inclúen diferentes accións de mentorización co foco posto na proposta artística, produción, promoción, comercialización e modelo de negocio. En concreto, o programa de formación grupal articularase arredor do discurso como elemento esencial para a conexión co público, a posta en escena, a produción de temas musicais e de videoclips, a estratexia no negocio da música ao vivo e o benestar emocional dos artistas. A segunda fase dedicarase á promoción e difusión dos proxectos a través da súa participación en circuítos de concertos, festivais e mercados profesionais, dentro e fóra de Galicia, ademais dun evento final de presentación das propostas.
Os 12 proxectos participantes son:
ABRIL
Proxecto de música folk contemporánea formado por Claudia Abril, Marina Carpente e Antón Lago. Voz, percusións tradicionais como a pandeireta ou o pandeiro, violín folk e guitarra clásica para levar a escena un coidadísimo repertorio que contribúe á posta en valor da música tradicional galega sen deixar de lado a modernidade.
AMOEBO
Perfil en galiciantunes | Entrevista en galiciantunes
Son a reconstrución da verbena galega, unha proposta de música urbana que bebe de ritmos latinos e pop dos anos oitenta. Amoebo son festa e diversión sen andrómenas, bailes desmedidos e moito humor, con temas que tocan o costumismo galego, o amor, o sexo e o día a día da xuventude galega. A súa síntese de sons evoca ao pasado ao ritmo de funk pop, cumbia, bachata ou merengue, estilos que o artista combina con outros máis actuais, como o autotune e os drums agresivos.
CANDELA LISTE
Artista coruñesa con ampla experiencia como compositora, instrumentista e cantante; primeiro como guitarrista de Prexton, logo liderando a súa banda de rock dos setenta Crimson and Clover e, agora, como solista. Cunha pasión inquebrantable pola música e o arte, as súas cancións conectan a nostalxia polo pasado da música coa frescura do presente e, alén de etiquetas, xogan coa fusión de diferentes estilos, creando melodías que deixan pegada na alma de quen as escoitan.
CATUXA SALOM
Artista galega de raíces arxentinas e unha das voces máis potentes da escena folk electrónica do momento. No seu debut discográfico experimenta coa música tradicional galega, os ritmos latinos e as bases electrónicas, acadando así unha sonoridade que nos conecta co noso lado máis salvaxe. De Aimogasta ás montañas de Lugo, Catuxa Salom constrúe un relato cargado de simbolismo onde a natureza e o movemento están en primeiro plano. O seu directo magnético e vibrante prométenos ritmos de baile.
ERIS MACKENZIE
Proxecto en solitario de Carlos Eirís quen, autodidacta e curioso ata o extremo apoiándose dun piano e un ordenador, converteu a produción musical no seu lugar feliz, onde experimenta e se expresa con total liberdade. Cunha vida chea de clarescuros, este artista, compositor e produtor asina composicións intimistas e costumistas envoltas nunha combinación de melodías eclécticas.
FILLOAS
Artista de pop urbano en galego que ofrece unha música coa que non pararás de bailar e moverte. O seu estilo baséase na autenticidade das súas letras, que se mesturan con ritmos clásicos como o punk con outros máis modernos como o hyperpop ou o trap. A música do Filloes é un reflexo da súa vida e das súas experiencias abordando os seus sentimentos máis profundos, pero buscando sacar un sorriso (considérase basicamente un meme) e intentando transmitir unha mensaxe positiva.
FRENCH RIVIERA
Perfil en galiciantunes | Entrevista en galiciantunes
David Fermoselle, músico, compositor e produtor gallego, está detrás de French Riviera; sinónimo dos 80, do retro, da época dourada das películas de acción, as luces de neon e as pistas de baile. Logo de publicar dous singles, Venusberg e Dancing, French Riviera lanza o seu álbum Weekend in Montecarlo (2021), que segue o ronsel dos oitenta, pero lle engade toques modernos coa intención de presentalo en todos os escenarios posibles.
FUTURO ALCALDE
Futuro Alcalde é o álter ego que utiliza Fernando Sanmartín no seu proxecto musical, un rapaz de Santiago de Compostela ao que lle gusta xogar con música sen medo a nada. O seu estilo caracterízase por mesturar sons punk con caixas de ritmos, aínda que a guitarra eléctrica é un instrumento incuestionable nas súas cancións, dando como resultado un son con moita actitude e presenza. Os seus temas están cargados de rabia con melodías atractivas e sentimentos cos que é doado empatizar. En marzo de 2023 publicó Bailando en Paraíso, un EP composto por cinco cancións que deixan entrever a aposta máis desafiante do cantante.
HABLÓ PABLO
Habló Pablo é un MC e letrista galego que, logo dunha paréntese de sete anos, rexorde de forma totalmente independiente, presentando un proxecto innovador que combina o rap coa poesía slam. As ganas de renacer foron tantas que, desde abril de 2022 a outubro de 2023, publica 13 sinxelos e 8 videoclips, acumulando preto de 90.000 visualizacións. Un dos seus traballos máis recentes foi a canción “Forza Dépor”, un himno para o club da cidade herculina que, xunto con Berto, transforma nun cántico para todos os seareiros blanquiazuis.
JAVIER LAGO
Cantante e compositor pop, Javier Lago (Vigo, 1996) criouse entre cancións de autor e a música de finais dos 90 e principios dos 2000, o que rematou por influír nas súas composicións; unhas onde a melodía vocal se presenta como total protagonista e a música se move entre sons clásicos e actuais. Lago comezou a definir o seu camiño como cantautor desde moi pequeno, estudando violín no conservatorio e creando coa guitarra e teclado en casa. Logo de liderar o grupo Australia, co que gañou o #SonidosMans 2016, arríscase en solitario lanzando varios sinxelos ata a publicación do seu álbum debut, Perdón por las molestias (2024), a finais deste mes de xaneiro.
MARIÁN
Bebendo de sons afroamericanos, do soul e do gospel, Marián debutó en 2020 con “Born to Shine”, un sinxelo que, daquela, era toda unha declaración de intencións; a cantante coruñesa deixaba unha carreira profesional no mundo da publicidade para perseguir o seu soño musical. Catro anos máis tarde, Marián está a piques de presentar o seu primeiro disco, un longo conceptual repleto de mesturas e fusións estilísticas, linguas e mensaxes catárticas que convidarán ao oínte a experimentar unha viaxe interior para conectar coa súa parte máis salvaxe e xenuína.
VERTER GZ
Festa, bo rollo, enxeño e humor: todo isto é o que combinan Kete e Miguel para crear un espectáculo que non deixa indiferente a ninguén. Verter GZ é un proxecto onde todo é posible, desde planificar funerais a ritmo de perreo ata aprender polaco bailando polca. O seu álbum, Perfecta Espiral de Ideas Absurdas (2023), transmite perfectamente a esencia de Verter: dous colegas que queren pasalo ben facendo música e desfrutando. Nin sequera eles son capaces de definir o seu estilo, que se resume nun «facemos o que nos dá a gana».