O círculo das formigas, Os John Deeres

Non, non era unha inocentada; Os John Deeres lanzaban o seu novo traballo discográfico o pasado 28 de decembro, Día dos Santos Inocentes, como xa adiantaban días antes. O círculo das formigas (2024) marca a cuarta referencia da banda de hard rock da Estrada (Pontevedra), un álbum conceptual dividido en dúas partes: ‘Pulso’ e ‘Inercia’, cada una composta de catro partes. En total, oito cancións que amosan a evolución sonora do quinteto que, aínda mantendo o guitarreo propio do rock duro, desta volta sorprenden cunha boa dose de sintetizadores, facendo que Os John Deeres soen «un pouco máis a Pink Floyd».

2024 Mixtape, MisterMyr

Logo de lanzar un puñado de sinxelos e unha BSO ao longo do ano, MisterMyr non quería pechar 2024 sen un derradeiro lanzamento. O artista pontevedrés residente en Santiago de Compostela, publicaba 2024 Mixtape (2024) a finais de decembro, un álbum que recolle 17 cortes dunha gran variedade de estilos, mesturando ritmos urbanos con outros más clásicos sobre unha base de electrónica capaz de potenciar, e manter, a concentración do oínte. Ademais da composición e interpretación dos temas, MisterMyr encargouse da súa produción, faceta pola que tamén é coñecido.

Dende o meu corazón, Anxo Vigo

Dous anos despois do seu último lanzamento, o cantautor coruñés despedía o ano coa publicación de Dende o meu corazón (2024). O novo disco de Anxo Vigo chega logo de «moitas xornadas de traballo» durante unha época na que o artista semella recorrer á música para sobrelevar a perda de seres queridos. A ducia de pezas do longo reflicten vivencias e lembranzas nas que Vigo verte grandes doses de sentimento e ilusión co obxectivo de chegar, desde o seu corazón, ata o corazón de todos os galegos.

Iberia, ZOAR

ZOAR rompe máis dun lustro de silencio discográfico con Iberia (2024), un álbum no que o grupo adaptou a suite homónima para piano do compositor catalán Isaac Albéniz. O conxunto de cámara coruñés, recoñecido pola súa aposta por traballar con compositores ou adaptar grandes obras clásicas, presenta unha ducia de pezas (catro cadernos ) como resultado de seis intensos anos de traballo; un traballo que abrangueu adaptación, corrección e revisión ata dar coa que, probablemente, sexa a primeira adaptación para quinteto de vento desta obra de Albéniz. Composta orixinalmente entre 1905 e 1909, Iberia traslada o oínte á Andalucía de principios de século a través de melodías propias do folclore e sonoridades típicas da música flamenca.

Algunos cabos sueltos, Todo el Largo Verano

Como o propio título indica, o novo disco de Todo el Largo Verano recompila algúns cabos sonoros elaborados en Ferrol entre os anos 2027 e 2024. Deste xeito, en Algunos cabos sueltos (Ferror Records, 2024) o oínte escoitará as xa coñecidas “¿Dónde estás?” Ou “Pues no os fuérais”; outros temas antigos pero remasturados ou remasterizados como “Vámonos juntos”, “Es como un sueño”, “Al olivo”; e mesmo unha inédita, “Nueva declaración de intenciones”, que segundo eles mesmos confesan, «ía ser a peza principal do seguinte EP, pero nunca se levou a cabo». Ademais de atar esta colección de 11 «cabos soltos», o disco recompilatorio celebra as dúas décadas de traxectoria da banda de pop psicodélico.

The Truth of It All, Luis Álvarez

Compositor, produtor musical e pianista, o lucense Luis Álvarez publicou máis dunha ducia de referencias durante o ano pasado. Entre elas atópase The Truth of It All (Sonder House, 2024), EP lanzado a mediados de decembro e co que pechaba un frutífero 2024. Gravado, producido e mesturado na Coruña, os seus tres cortes entregan un magnífico traballo de piano solo, poñendo en evidencia a mestría de Álvarez fronte ás teclas do instrumento e a súa capacidade para crear composicións minimalistas, pero cargadas de emocións.

Sesión Demosónico, Dioivo

A mediados de decembro, o dúo vigués de metal convidaba aos seus oíntes a lembrar os vellos tempos —os seus vellos tempos— co lanzamento dun novo traballo discográfico. Baixo o título de Sesión Demosónico (2024), Dioivo presenta unha demo na que revisitan os seus inicios, versionando do xeito máis cru posible temas que os definiron como grupo, ademais de incluír algunhas cancións propias. O EP vén envolto nun deseño realizado a partir dunha foto de Anaí Zugazagoitia feita no concerto do CIFP Audiovisual de Vigo, mentres que o logo o asina Emilia Vidal-Hallett.

17, atún blanco

Levábao adiantando hai meses —exactamente 12— e, logo de acadar con éxito unha campaña de micromecenado, atún blanco regalábanos 17 (2024) ao completo. O novo artista coruñés presenta unha «viaxe cíclica» composta por cancións orixinais que el mesmo escribiu entre 2018 e 2023 que representan un camiño e un significado. Envoltas nunha acústica delicada e experimentación electrónica, as pezas de 17 falan sobre temas existenciais, relacionais e sociais, vistos desde a subxectividade máis radical para, segundo procura o artista, tocar algo universal. Coa axuda de Iago Blanco de Drum & Roll Studios (A Coruña), atún blanco acadou construír temas moi diferentes pero cunha sinatura sonora común: rota, delicada, crúa por momentos, íntima, onírica, intensa... e a saltos entre extremos. A publicación de este álbum, cargado de imaxes, símbolos e sensacións, marca un final e dá comezo a algo distinto, algo diferente a estas lembranzas distantes, a estes restos dun soño pola mañá que atún blanco fixo canción.

Land of Witches, Dark Embrace

No seu novo álbum, Land of Witches (Massacre Records, 2024), Dark Embrace explora as influencias máis escuras da nosa terra, terra de meigas, e a esencia escura do seu propio estilo dun xeito moito máis maduro. Producido por Chris Clancy, encargado do son deste feitizo de música heavy, o LP adéntrase en artes escuras e invocacións demoníacas en nove cortes de cánticos, ruídos agudos, distorsións arrepiantes, frecuencias baixas e ritmos pagáns.

Revolución, IGMIG

Volveu IGMIG —non é que se fosen, só estaban a tomarse uns anos de descanso durante os que os botamos de menos— cunha nova formación (agora son catro!) e un disco baixo o brazo. O seu terceiro álbum, Revolución (Galunk Producións, 2024), saía o pasado 12 de decembro logo de seis meses de traballo en estudio. O longo, composto de nove cancións, presenta «unha revolución con himno propio», cargada de humor e retranca, que a banda viguesa entrega con total liberdade creativa, sen ataduras e con as colaboracións de Menina Arroutada e Queen Rendi.

Tradimensional, AILÁ

O pasado verán, AILÁ pasou de ser un trío a un cuarteto coa incorporación da zanfonista ferrolá Manu Fraguela, pero o grupo tradi gardaba unha sorpresa máis por descubrir antes de rematar o ano. O xoves 11 de decembro saía Tradimensional (2024), o seu novo disco e terceiro xa da súa carreira; un longo no que Manu (zanfoña) une o seu talento ao de Ánxela Carou (voz, percusión), Manuele Pardo (voz, percusión, gaita) e Xan Pampín (acordeón, batería). Cargados de arranxos modernos e enérxicos, os dez cortes que recolle o álbum conforman unha homenaxe a todas as vivencias que rodean o noso baile e a nosa música personificadas nas pandeireteiras, instrumentistas e bailadoras que, durante anos, desfrutaron mantendo e transmitindo a tradición e o patrimonio colectivo. Tradimensional é tamén un agradecemento sonoro ao traballo de moitas persoas, tal e como contan eles mesmos: «as agrupacións de música e baile tradicionais foron quen de aglutinar e espallar esta riqueza por todas as localidades da nosa xeografía para manter viva a alma dun pobo». E, como elas, AILÁ continúa así e agora a súa faísca.

ACT III: This is not about you and me. This is about us, Cora Novoa

Cora Novoa vén de completar a súa triloxía Mental Diary, a máis vangardista ata a data, coa publicación de ACT III: This is not about you and me. This is about us (Seeking The Velvet, 2024). Os nove temas que recolle o longo constrúen unha atmosfera escura, vaporosa e misteriosa que, a través de sintetizadores modulares e gravacións analóxicas, reflicte a complexidade e incerteza do noso tempo. Neste «terceiro acto», a compositora e produtora galega explora conceptos como a existencia humana na era dixital, reflexionando sobre temas como a intelixencia artificial, o cambio climático ou a procura dun sentido de comunidade nun mundo cada vez máis fragmentado. Dispoñible nas principais plataformas dixitais desde o 5 de decembro, ACT III tamén conta cunha edición en casete limitada a 100 copias.

🎧 Sigue a nosa lista de Singles en Spotify para estar ao día das novidades discográficas dos artistas e grupos de galiciantunes.com!

🎧 E se es dos maximalistas que o queren todo, tamén podes seguir a de Álbums cos discos completos!