A Sala Capitol (Santiago de Compostela) acolleu a presentación da convocatoria dos los XII Premios Martín Códax da Música, promovidos por Músicas ao Vivo e coa colaboración e apoio de Industrias Culturais (Xunta de Galicia), na que o público xogará de novo un papel fundamental na elección dos proxectos premiados. Segundo os datos da organización, preto de 4000 persoas participaron na quenda de votacións de 2024, ano no que por vez primeira se posibilitou esta participación externa.

Desde onte, e ata o vindeiro 23 de marzo, as bandas e artistas que o desexen xa se poden inscribir na duodécima edición dos Premios; a convocatoria está dirixida a todos os proxectos musicais galegos vixentes e en activo en 2025, agás os que xa foron premiados na edición anterior. A inscrición é libre e gratuíta, e farase polos propios artistas, grupos, ou músicos integrantes do proxecto, representantes ou axencias de representación a través da web.

As 15 categorías que conforman os Martín Códax son:

• Pop e Indie
• Rock e Punk
• Blues, Funk e Soul
• Metal e Heavy
• Canción de Autor/a
• Músicas Urbanas
• Músicas do Mundo e Mestizaxe
• Electrónica
• Música Clásica e Contemporánea
• Jazz e Músicas Improvisadas
• Música Tradicional
• Música Folk
• Música Infantil
• Orquestras, Grupos e Música de Verbena
• Bandas de Música Popular

Ademais de Organistrum (Salas, Festivais e Medios de Comunicación) e para a categoría extraordinaria de Artista Emerxente. 

Unha vez finalizado este prazo de inscrición, o xurado profesional valorará as candidaturas nun proceso que se desenvolverá durante o mes de abril e do que sairán tres finalistas por categoría. Xa en maio, abriranse as votacións ao público e ás persoas asociadas a Músicas ao Vivo. O 28 de maio darase a coñecer o nome dos gañadores deste ano no transcurso da gala de entrega, que volverá ter lugar en Pontevedra e que, segundo adiantou a organización, gardará estreita conexión co Día das Letras Galegas 2025, dedicado ás cantautoras e á poesía oral tradicional.

ℹ️ Consulta as bases e información adicional seguindo esta ligazón.