GalicianTunes: Artista - Cristian Silva

GALEGO
ESPAÑOL
ENGLISH

Cristian Silva

Cristian Silva é un artista polifacético con dominio en varios estilos e diversos instrumentos de todo tipo. Posúe unha ducia de primeiros premios en concursos de música tradicional, ademais de colaboracións con multitude de artistas como Carlos Núñez, Susana Seivane e Rosa Cedrón, entre outros.

Producido ao completo polo propio músico, “EGO” é o seu primeiro traballo en solitario, unha viaxe onde, a través de dez pezas, a gaita e as frautas mestúranse con sintetizadores e percusión galega para levarnos a un novo e innovador planera sonoro, onde a tradición se funde coas vangardistas técnicas interpretativas da gaita e a música indie-pop con influencias de rock, flamenco e música electrónica.

Logo do seu primeiro EP en solitario en 2015 e o libro-CD “Manual Ególatra Básico” (2017), o ecléctico artista presenta o seu novo sinxelo “Lobo Estepario”, un tema co que abre as portas do seu vindeiro traballo discográfico que verá a luz a finais de ano. Un álbum marcado pola conxunción de bases electrónicas, voces, sintetizadores, gaitas e frautas filtradas por pedais.

Cristian Silva conxuga as súas diferentes facetas artísticas para ofrecer un espectáculo transgresor. Acompañado pola EGO Band e cunha coidada estética escénica, o produtor carrilexo ofrecerá a evolución dun directo rodado por diversos escenarios da Península Ibérica e México.