O vindeiro mércores 22 de maio comeza a XVI edición do Festival de Cans e xusto ao día seguinte, xoves 23, terá lugar o Concurso de Videoclips na praza do Concello, onde se proxectarán os 19 videoclips da Sección Oficial.

Onte repasabamos os dez primeiros vídeos da Sección deste ano e hoxe completámola cos últimos nove.

“Ponte de pijo” – Contenedor de Mierda. Dirixe: Sara Iglesias

«WordArt, corrosión punk e pijos de Pontevedra», tres conceptos que describen o último videoclip de Contenedor de Mierda. Dirixido, e protagonizado, por Sara Iglesias —que xa tivo realizado vídeos para outras bandas do circuíto galego como Leo Arremecághona— o clip de case minuto e medio é unha oda á cultura trash tardonoventeira. Sarcasmo, xogos de palabras, melodías inmediatas e correción política nun traballo audiovisual tinguido de neon e acompañada do, sempre-presente Clipo.

“Val” – Pantis. Dirixe: Rubén Domínguez

Pantis estreaba febreiro con Val (2019), a súa terceira referencia discográfica. O single, gravado e mesturado por Hevi en Santiago de Compostela e masterizado por Jammin Master en Berlín, viña acompañado dun videoclip realizado polo propio creador —si, Pantis é o álter ego de Rubén Domínguez— composto por unha serie de fragmentos visuais difusos, de psicodelia en branco e negro con mínimos refachos de cor. Co loop como ferramenta expresiva, capturando a maxestosidade paralizada e o nervio que o caracteriza, Pantis repite nomeamento, o seu “Mar” acado coarse nesta mesma Sección na pasada edición do festival.

“Sola con mi voz” – Blanco Palamera. Dirixe: Adrián Canoura

Blanco Palamera, dúo compostelán de R&B, debutaba con Promesas (Raso Estudio, 2019), LP de dez cortes extremadamente delicados que serven unha coidada mestura de pop alternativo e música negra contemporánea. O cineasta e realizador Adrián Canoura firma o vídeo de “Sola con mi voz”, corte de sons suburbanos que engancha desde a primeira escoita; unha peza en branco e negro, cun xogo de luces, sombras e desenfoques á beiras do mar.

“Totally Wired” – MounQup. Dirixe: Camille Hedouin e Didier Jujax

«Coidado pode doer orellas e ollos», deste xeito presentaba MounQup “Totally Wired”, videoclip que acompaña a súa versión desta orixinal que The Fall presentaba en setembro de 1980. Dirixido por Hedouin e Didier Jujax, a artista multidisciplinar afincada en Ourense fixo esta versión para A Gala, espectáculo de danza contemporánea, baseado na figura de Maruja Mallo, a cargo da compañía Licenciada Sotelo.

“Gris” – BASANTA. Dirixe: Xaime Miranda

Basanta presenta outra das súas solemnes cerimonias nun videoclip de case catro minutos de duración no que a tradición e folclore galegos son protagonistas. Dirigido por Xaime Miranda, “Gris” descóbrenos o mundo máxico do Entroido de Ribeirao, unha tradición prohibida durante a Guerra Civil que a Galicia rural decidiu recuperar nas últimas décadas. Personaxes características, volantes e maragatos, bailan ao son da psicodelia do cuarteto vigués en espazos impecablemente elixidos da Mariña lucense, como a fervenza de Santo Estevo do Ermo (Barreiros), as rúas de Mondoñedo ou a costa de Ribadeo, que fan de escenarios naturais nesta viaxe «pola terra das meigas e da Santa Compaña».

“Somos Incendio” – Berta Franklin. Dirixe: Rubén Domínguez

Estreado en primicia hai un par de meses no Ho! Gruf do seu Lugo natal, “Somos Incendio” é o single presentación do último traballo, homónimo, de Berta Franklin, quinteto rockeiro que vén de gañar o #SonidosMans 2019, polo que se subirán ao escenario de PortAmérica en xullo. O «impresionante» clip, dirixido por Rubén Domínguez e producido por Prenom, reflicte a expresividade coa que Berta Franklin delicadamente interpreta as súas letras, en galego, tomando referencias de Pop ou Tindersticks.

“O fío do que pendo” – MJ Pérez. Dirixe: MJ Pérez

Cun ritmo diferente, grazas ás percusións de Ailén Kendelman, “O fío do que pendo” foi a terceiro single-clip do seu terceiro traballo, Casandra (2017); un disco que MJ Pérez adiantaba con “Ai de min!”, videoclip que realizou coas súas mans de principio a fin. En “O fío do que pendo”, a cantautora arzuá quixo repetir a experiencia nun clip feito integramente por MJ Pérez, desde a gravación ata a montaxe e postprodución, no que as súas mans volver ser protagonistas.

“Vision” – Window Pane. Dirixe: Peque Varela

A axencia de publicidade na que Peque Varela, directora e animadora galega afincada en Londres, estivo a traballar durante unha década declarouse en bancarrota e botou o peche sen pagar polo traballo realizado. Antes de que «caese» o servidor, gardou tantos anuncios nos que traballara como puido e reutilizounos sen incluír as ilustracións do cliente. Así naceu o videoclip de “Vision”, tema que abre o último LP de Window Pane, 4 (2017), baseado nun vello clip da banda que, combinado co arte vintage de Varela, resulta nun universo onde as mentiras ocultan a verdade.

“Loco Chamanes” – Thee Blind Crows. Dirixe: Gero Costas

Thee Blind Crows celebra o seu décimo aniversario enriba dos escenarios con Death Awaits Us All(2019), intenso longa duración que destiña garage-punk con influencias do blues clásico. Con Gero Costas na dirección en Romina Doce na produción, ambos de Producciones Mutantes, “Loco Chamanes” foi o single-clip adianto, unha danza macabra cargada de misticismo e visceralidade, con psychopomps y Mamá Camila incluídos, a ritmo de blues-punk e ecos synth; unha obra audiovisual con alma tribal e filtro vermello como o sangue...