¡Novo concerto de Directos Xacobeo’21! Lembrade que as actuacións están divididas en capítulos (un por canción). Deste xeito, resulta máis sinxelo tanto acceder a calquera parte da gravación como saber exactamente que tema escoitamos en cada momento con só botarlle unha ollada á barra de progreso. Alén diso, no propio vídeo, aparece un rótulo co título ao comezo de cada tema.

Club Clavicémbalo

Di a lenda que desde hai máis de tres décadas, se pasas por Lugo non poderás evitar acudir á chamada dun local onde a música vívese e o ambiente che atrapa. Situado na rúa Paxariños, o Clavi e xa un templo da cultura que viu crecer e acompañou a unha morea de artistas ao longo da súa carreira. Berrogüeto ou Violadores del Verso son tan só dous grupos dos tantos e tantos que pasaron pola sala, caracterizada tamén por dar oportunidades aos máis novos, mesmo colaborando na actualidade con escolas de música dándolles a oportunidade aos seus alumnos de presentarse ao público. Mais non só é música o que se respira nesta sala, xa que tamén acollen espectáculos cómicos, contacontos, exposicións, e un longo etcétera. O Clavicémbalo foi ampliando a súa oferta musical ao longo dos anos, acollendo jazz, pero tamén blues, funky, flamenco ou rock.

Dirección: Rúa dos Paxariños, 23, 27002 Lugo (Lugo)

Web: https://www.clavicembalo.com/es/

Wealman

Trátase do primeiro proxecto musical liderado por Ro Muñoz (batería), quen xuntou a música que estivera grabando durante os últimos quince anos mentres tocaba noutras bandas. Nesta aventura está acompañado por Chema Corredoira (guitarra), Gonzo Piña (baixo) e Toño Otero (saxo), tres músicos de calidade que transitan os camiños de diversos estilos, o que resulta nunha fusión sonora sorprendente. Nas súas composicións, o jazz fusiónase co funk, o rock e a música electrónica, creando texturas innovadoras que farán as delicias de todo melómano.

Bird Lives

Esta banda saltou ao escenario recentemente, en agosto de 2020, no Festival Feito a Man de Santiago de Compostela. Alejandro Vargas (piano), Ana Sanabria (batería), Marcos Pin (guitarra) Pablo Añón (saxo), Pablo Castaño (saxo), Pablo Sax (saxo) e Yudit Almeida (contrabaixo), decidiron arrexuntarse para render homenaxe ao seu ídolo, o saxofonista Charlie Parker, tamén coñecido como Bird, no centésimo aniversario do seu nacemento. Mediante as súas versións, coidadas con moito agarimo, e o virtuosismo co que tocan este jazz, fan máis certa que nunca a afirmación “Bird lives”, dando a máxima entrega e da forma máis honrada posible.

Lacón con Grelos Blues Band

Logo duns primeiros anos como trío de power blues facendo versións de temas de finais dos anos 60 e principios dos 70, esta banda lucense pasa a estar formada por cinco integrantes, e presentan xa unha proposta persoal propia na que mesturan o blues rock sinfónico máis psicodélico co jazz rock fusión. Gonzo Piña (baixo), Luis Monsalve (teclados), Paul Baker (voz), Rodrigo Muñoz (batería) e Saulo Sause (guitarra) son os encargados de elaborar unhas letras socialmente comprometidas e actuais, ademais dun directo do máis divertido e cheo de disfraces, onde amosan a súa electrificante fórmula co obxectivo de poñer a todo o mundo en pé nun frenesí musical.

Sandra Calderón

Coruñesa con alma flamenca, así é, en poucas palabras, Sandra Calderón. Os seus primeiros achegamentos ao mundo da música foron a través do jazz, do que podemos apreciar certas reminiscencias nas súas composicións actuais. Desde ben pequena admiraba a cantaores e bailaores, quen cría que eran seres extraordinarios capaces de infundir todo o sentimento do mundo na súa arte. Nas súas letras, Calderón deixa patente o seu compromiso con causas sociais, xa que colabora tamén con asociacións contra o racismo ou a discriminación, entre outras.