Wöyza & The Messengers, Wöyza & The Messengers

A idea era partir de cancións que xa son parte do acervo musical galego e reinterpretalas dun xeito contemporáneo levándoas ao hábitat natural de Wöyza e da súa magnífica voz: o soul, o hiphop ou o gospel. Todo arroupado cunha banda de auténtico luxo: Xulio Lorenzo (gaita, frauta, pandeireta e coros), High Paw (baixo e coros), Jorge Juncal (teclados), David Outumuro (batería e percusión) e María Faltri (pandeireta, percusión e coros) acompañados da danza urbana de Yara Juncal, tamén encargada da coreografía. Case nada! Os primeiros temas xa os presentaran na Feira Internacional de Turismo de Frankfurt en 2018 e, máis tarde, no Festival dos Eidos de Outono, na serra do Courel. Algúns deles foron aparecendo en forma de singles: «Ay Deus se sab’ora meu amigo (Vou namorada)» (cantiga de amigo de Martín Códax), «Campo estrelado» (composto por Wöyza e estreado na Cidade da Cultura) e «Cain as follas» (sobre a versión de Emilio Cao dun poema de Uxío Novoneyra). Wöyza & The Galician Messengers reúne agora eses singles do proxecto homónimo acompañados dalgúns extras. Hai dous remixes: Marta Toro remestura «Campo estrelado», mentres Músculo! fai o propio con «Ay Deus se sab’ora meu amigo (Vou namorada)»; e hai tamén unha nova canción, «Tempos de muller», composta por Wöyza e gravada ao vivo no Courel.

Soldadeiras, Carolina Rubirosa 

Se Laura Lamontagne & PicoAmperio reinterpretan a lírica medieval galego-portuguesa dende a electrónica e o hip-hop, Carolina Rubirosa faino cun enfoque netamente máis pop, aínda que non falten loops, sintes e programación. En Soldadeiras a aproximación da cantante, compositora e produtora abrangue un número maior de autores, concretamente, e por orde, Joan Meendiz de Briteiros, Bernal de Bonaval, Joan Airas, Joan Servando, Joan Soarez Coelho, Juião Bolseiro e Paai Gomez Charinho, e algunhas desas cantigas de amigo son musicadas por primeira vez. E malia que foron pensados e escritos para ser cantados, resulta apaixonante observar o contraste deses poemas dos séculos XIII e XIV coas músicas e arranxos do século XXI cos que Carolina Rubirosa os envolve; e como, non obstante, o prodixio do ritmo dos seus versos, a súa métrica, facilita, á vez, o proceso. O primeiro single, «Deus! que me leda que m’esta noite vi», veu acompañado dun singular lyric video realizado por Iria Iglesias con intelixencia artificial e máis de 1000 imaxes inspiradas na Idade Media que van progresando cara á abstracción. O proxecto Soldadeiras foi premiado no certame «Fondo de proxectos culturais do Reino de Galicia 21-22», convocado pola Deputación da Coruña.

Atenta!, Quant

Pouco máis dun ano despois do longa duración Basado en hechos reales, Atenta! é o novo de Quant. Un enerxético EP de catro temas (dous en galego e dous en castelán; un, «Un millón de cajas de cartón marrón», xa presente no traballo anterior pero agora reformulado) no que Óscar Quant e Alberto Amigo consolidan o xiro que xa anunciaba o seu anterior traballo: abandono do inglés nas letras e aposta por unha instrumentación pensada para un directo defendido só por eles dous no escenario. O seu singular pop de corte underground segue, afortunadamente, aí. Pero se o anterior era máis introspectivo, este álbum está máis enfocado á descrición (ou á sátira) do mundo en que vivimos (que tampouco é que faltara en Basada en hechos reales). «A fábrica está en todas partes [...]. É o tempo e o espazo da supervivencia cotiá. É o costume dos xestos repetidos, das paixóns rexeitadas e vividas por delegación, por imaxes interpostas» como di o texto de Raoul Vaneigem que citan en Bandcamp. «Atenta!» foi gravado, misturado e masterizado nos estudios Sousolito de Óscar Quant e ademais de en plataformas dixitais, está dispoñible en edición física en vinilo de 7 polgadas editado por Ferror Records e Discos de Corte.

Diante dun eco, SÉS

Diante un eco é o oitavo traballo de Sés, que ela mesma define con precisión en dúas frases: «ritmos americanos do norte e do sur repensados en galego e en femenino» coas «doses exactas de ‘rock and roll’, tradición oral galega e certa cadencia de canción de autor latinoamericana con actitude punk, reivindicación e manexo escénico». Así que na ducia de cancións que compoñen o álbum escoitamos a unha Sés moi recoñecible e madura que volve conectar con mestría as músicas populares de Galicia e de toda América, ese inesgotable manancial de sons que brotan do pobo e do que a compositora coruñesa se sente amante e deurora. E malia que o título evoca ese conepto hegeliano de triste actualidade de que a historia se repite, o disco reborda enerxía, frescura e alegría. Diante un eco é Sés en estado puro.

A música das buguinas, BellónMaceiras

 Xa fora publicado como libro-disco, ilustrado por Leandro Lamas sobre un texto de Pepablo Patinho, a finais de 2021, que, á súa vez, partía dun espectáculo didáctico de BellónMaceiras narrado por Gloria Mosquera (Mamá Cabra). Pero agora «A música das buguinas» vén de estrearse en plataformas dixitais tanto en galego (narrado por Gloria Mosquera) como en castelán (con narración do autor do texto, Pepablo Patinho). Ademais do conto completo todas as pezas que aparecen nel están recollidas no disco como cortes independentes. Algunos de esos temas son populares e otros fueron compostos por Daniel Bellón e DIego Maceiras. E hai un grande abano de xéneros tradicionais como muiñeiras, alboradas, pasodobres... O conto preséntanos a Roque, un neno que vai descubrindo a música, primeiro a que agochan os sons da natureza, e despois a través das ensinanzas e vivencias coa súa familia e veciños. Todo o vai capturando coa buguina recollida na praia da Frouxeira que lle regala a súa madriña.

BellónMaceiras tamén está a celebrar o décimo quinto aniversario do seu primeiro álbum. Unión das Terras 15 aniversario é unha edición limitada en USB que, ademais do disco tal como foi publicado, inclúe catro novas pistas: un tema inédito e tres versionados por BellónMaceiras Quinteto gravados ao vivo en Italia e Portugal (un deles en formato vídeo).Pódelo atopar na web bellonmaceiras.com e na Escola de Música BellónMaceiras en Fene.

Cataratas del paraíso, MARYLAND

Despois de catro anos, MARYLAND vólveo facer; volve cun disco que desborda autenticidade, sensibilidade e a enerxía que lles caracteriza. Gravado por Pancho Suárez de Lis en Planta Sónica (Vigo), con produción da propia banda, e mestura e master de Santi e Víctor García de Ultramarinos (Barcelona), Cataratas del paraíso (Subterfuge Records, 2022) presenta 11 temas que conforman unha montaña rusa de emocións a través de subidas de melodías pegadizas e baixadas de letras honestas e sinceras. Dispoñible tanto en formato físico —en CD e unha edición limitada en vinilo de cor branca— e dixital, a cuarta referencia do cuarteto vigués chegaba unha semana despois do seu derradeiro adianto, ‘Mi emperatriz infantil’, unha oda enérxica ao amor interminable, a ese que se vive cada día unha e outra vez.

Variaciones Vol. 1, Javier Otero Neira

Pouco máis de medio ano pasou desde o lanzamento de Saraiba (2022), o que era, ata o venres pasado, o último disco e máis persoal de Javier Otero Neira. Pero o pianista galego volve a estar de estrea con Variaciones Vol. 1 (2022), un traballo inspirado nas Variacións Goldberg de J. S. Bach, non no seu son, senón no seu concepto. Para este ilusionante proxecto, Otero Neira traballou man a man co malagueño Cheap Monk, produtor e músico de hip-hop e electrónica instrumental. Xuntos, uniron as súas teclas —unhas de piano, outras de sample— para dar vida a estes catro cortes que destilan un son traballado e definido.

Un círculo helado, Carlos Ordóñez

«Un círculo helado» (Ferror Records, 2022) tiña que saír en marzo e a piques estivo de facelo no verán (cunha fugaz aparición en plataformas dixitais incluída), pero finalmente acabou vendo a luz en novembro. Algo que dá unha idea do febril proceso de depuración ao que somete Carlos Ordóñez o seu traballo: «A miña obsesión cos detallles raia a demencia, e isto provoca que sexa unha experiencia pouco grata: espontaneidade e inmediatez punk, igual a cero». De feito di que procura non escoitar de novo ningún dos seus traballos despois da masterización para non seguir atopando defectos. Escoitando «Un círculo helado», e o mesmo podería dicirse de «Retortoiro» (Ferror Records, 2021), o seu anterior traballo, costa crer os dera atopado. A produción coidada ata o máis mínimo detalle nótase en ambos. De feito, baixo un aparente minimalismo latexan texturas moi elaboradas con infinitos matices. Os catro temas do disco son fascinantes, unha delicatessen para os amantes da música electrónica (en realidade, para os amantes da música en xeral). A delicada alquimia vese xa no tema homónimo que abre o disco «supoño que é a peza máis accesible porque achega melodías moidefinidas. É tecnopop instrumental con certo toque futurista e shoegaze». O segundo corte, «La bailarina napolitana», inspirado na atracción de feira do mesmo nome, «é a peza máis experimental, con secuencias superpostas de sintes en diferentes dirección e velocidades; harmonías non convencionais e un beat un tanto hiphop». Segue «Esa materia fragmentaria», unha volta de porca ao tecno con depregamento de «subgraves e pinceladas sónicas, soltas, inconexas. Unha técnica de produción un tanto impresionista. Non está mal». E pecha o álbum o exotismo de «Perfumes del Oriente» influído polos poemas de Julio Aumente. O disco, cuxo deseño gráfico volve vir de mans de Jordi Serrano (Tisora Studio), é unha obra magnífica que convén desfrutar con atención e calma deixándose levar por un son que seduce dende a primeira escoita.

Boundaries II: Comtemporary Works for Flute and Accordion, Dúo Xistra

Boundaries II - Contemporary Works for Flute and Accordion é o segundo disco da serie Boundaries que Da_sh records dedica á música de cámara contemporánea, e é tamén o primeiro traballo discográfico do Dúo Xistra: Nerea Rodríguez (acordeón) e Juan Cernadas (frauta). Esta estrea de altura inclúe obras dos compositores Hugo Gómez-Chao Porta (Galicia, nado en 1995), Luis Fonseca (Brasil, n. 1974), Antonio Covello (Italia, n. 1985), David Cantalejo (País Vasco, n. 1985) e Antonio Celso Ribeiro (Brasil, n. 1962). Das cinco pezas que compoñen o disco, catro foron encargadas por Da_sh music para ser interpretadas e gravadas polo dúo. A quinta, «Ventos» de David Cantalejo, foi un encargo de Juventudes Musicales de España para que Nerea e Juan a estrearan na Red de Músicas. O disco é o primeiro rexistro mundial de todas estas composicións. Boundaries II - Contemporary Works for Flute and Accordion foi gravado entre o 1 e o 3 de agosto no Espacio Ronda de Madrid e está dispoñible en plataformas dixitais.

Odisea, Samudra Trío

Adiantabámolo hai case unha semana e, agora, é unha realidade: Odisea (2022), o primeiro disco de Samudra Trío, xa está dispoñible ao completo en plataformas dixitais e en formato físico. Hai uns anos que Laura, Jimena e Yamini uniron os seus camiños para amosar unha nova visión da música de cámara no panorama galego cunha formación pouco común; frauta, violoncello e piano son os instrumentos que este trío de novas artistas galegas utiliza para explorar a infinidade de sons e timbres que poden chegar a ofrecer vento, corda e teclado. Composto por sete pezas, o álbum é un percorrido sonoro de Occidente a Oriente con Europa como eixo, unha viaxe instrumental por sensibilidades estilísticas de todo o globo a través de diversas músicas clásicas do mundo, que son tantas e tan individuais como as culturas e as xentes que forman parte del. Para a súa Odisea, Samudra contou co pianista e compositor vigués Brais González, encargado da gravación, edición e mestura; e con Alberte Peitavel para a fotografía, sobre a que Jimena realizou o deseño gráfico que envolve o disco

Algo que sinalar, LaMontagne & PicoAmperio

Os dous adiantos, ‘Banharemos nas ondas’ en setembro e ‘Porque no mundo’ un mes despois, poñían o listón moi alto, case tanto como cada vez que se subían a un escenario; hoxe, co disco completo nas mans, poderiamos dicir que LaMontagne & PicoAmperio cumpriu as nosas expectativas. Composto por oito cortes, entre os que se atopa o seu recoñecido ‘Avelaneiras Frolidash’, Algo que sinalar (PlayPlan, 2022) é o primeiro longa duración do dúo que asina cancións hipnóticas de folk electrónico, o que constrúe un un iamxinario que destrúe fronteras temporais e estilísticas abrindo novos camiños a través de hip-hop, ambient, moito flow e tinguiduras de contracultura. LaMontage & PicoAmperio presentan un traballo que consolida ese atractivo híbrido entre vangarda e folclore galego, recontextualizando a música e literatura doutrora e traéndoas de volta ao presente con sons futuristas e tecnolóxicos, loops magnéticos e voces únicas. Algo que sinalar? Todo!

🎧 Sigue a nosa lista de Singles 2022 en Spotify para estar ao día das novidades discográficas dos artistas e grupos de galiciantunes.com!

🎧 E se es dos maximalistas que o queren todo, tamén podes seguir a de Álbums 2022 cos discos completos!