GalicianTunes: Artista - Belém Tajes

GALEGO
ESPAÑOL
ENGLISH

Belém Tajes

Belém Tajes (Bos Aires, 1985)

Cantante, compositora e especialista en musicoterapia, comezou tocando e cantando en agrupacións tradicionais, aprendendo tamén das cantigas das súas avoas, naturais da aldea de Arou, Camariñas. Estudou violoncello no Conservatorio da Coruña e tamén gaita no Conservatorio de Carballo.

Vén de formar parte da xira “Cable a Tierra” de Vetusta Morla en Barcelona, Bilbao e Madrid, tocando con eles e con El Naán no estadio Metropolitano ante máis de 25.000 persoas. Xirou con Luar na Lubre durante case un ano e medio, e percorreu con eles os principais teatros da península, visitando tamén México, Francia, Bélxica, Portugal, Escocia e Reino Unido. Con Luar na Lubre e outros artistas gravou o CD-DVD “Ribeira Sacra” (2018).

Ten participado en varias formacións musicais como cantora e percusionista con: Xosé Lois Romero e Aliboria, MOURA, con Pesdelán, e no coro Sisters in the House de Carmen Rey, entre outros proxectos.

Foi a música elixida para representar a Galicia no proxecto ‘Tosta Cultural Cargo’ sobre linguas minorizadas do Atlántico Norte. Grazas a este proxecto escribiu o seu primeiro libro, “Cantos do mar de Irlanda”.

Creou o proxecto musical Vudú, galardoado cun Premio Martín Códax e cun Premio Opinión de Músicas de Raíz. Agora lanza o seu primeiro EP en castelán “Un mapa” (2022), inspirado na súa terra de nacemento, Bos Aires.