Somos lucenses, consideramos Lugo a nosa cidade. E ten moitas cousas boas, como a magnífica comida ou a hospitalidade dos seus habitantes. Pero carece de algo, e é que a súa oferta cultural é ás veces limitada. Se ben é certo que en eventos como o San Froilán ou o Arde Lucus a cultura toma a cidade, o resto do ano non hai unha continuidade nese aspecto agás a que, por sorte, ofrecen locais como o Clavicémbalo. Se comparamos esta pequena actividade cultural coa doutras cidades e vilas galegas non saímos demasiado ben parados, a verdade.

Tamén somos galegos, amamos a cultura galega. E pensamos que é bastante triste que máis de vinte anos despois do Manifesto de Viana a situación do galego na música continúe sen estar normalizada. Loitamos contra isto escoitando música galega e vendo grupos da terra actuar por todo o país. En definitiva: consumindo cultura galega.

Por suposto, somos festeiros, encántanos a esmorga. E pensamos que Lugo é un lugar perfecto para facer festa… e non unha festa calquera, a festa d’A Candeloria. É unha festa ancestral que nos seus comezos era chamada a Festa da Luz, e celebra o paso do inverno á primavera. Queremos, á par de recuperar esta tradición milenaria, situar a Lugo no mapa festivaleiro galego e estatal. Queremos dignificar a cultura galega en xeral, e a música en particular.

Se pensas o mesmo ca nós, ti tamén es unha candeloria. E xa que es unha candeloria, tes unha cita inescusable na cidade amurallada no mes de febreiro. Dous días, música de grupos referencia en Galiza e España, acampada gratuíta, cantos de tarberna, Certame de Curtas e Videoclips, xogos populares e moitas máis actividades. Non faltes, que pasamos lista!!

Promotores: Asociación Cultural A Candeloria Lugo

Ano de creación: 2014

Periocidade: Anual

Duración: Dous días

Lugar de celebración: Lugo

Datas aproximadas de celebración: 4 de marzo 2023