GalicianTunes: Artista

GALEGO
ESPAÑOL
ENGLISH

Loiros

A banda nace no verán de 2016 en Vigo, Galiza, onde Héctor Agulla (batería) e Virxilio da Silva (guitarra, voz) comezan a traballar xuntos na idea dun novo proxecto. Nas súas primeiras composicións conciliaban rock alternativo e jazz a través dun prisma acústico, co uso das voces sen letra como un instrumento máis. Coa entrada dos membros que completan a formación, o alemán Felix Barth (baixo, voz) e o francés Wilfried Wilde (guitarra), o son endurécese, aparecen as primeiras letras e as composicións adquiren máis forma de canción, configurando a idea do que na actualidade é Loiros.

As aportacións do imaxinario musical dos catro compoñentes dan como resultado unha interesante mestura estilística na que están presentes tanto influencias do shoegaze, o grunge, o post-rock e a psicodelia, como do jazz moderno, o impresionismo francés ou a rítmica africana. O seu directo, de certo carácter intimista, é intenso e crú, con cancións longas, desenrolos inesperados e momentos para a improvisación que fan de cada concerto unha experiencia diferente.

Froito da súa primeira xira, en marzo de 2018 sae á luz o seu primeiro traballo “Arp”, un EP completamente autoproducido e autoeditado cunha edición limitada feita a man de 150 exemplares. En decembro dese mesmo ano, reciben o premio da Deputación de Pontevedra ao Mellor Traballo Musical coa canción “Rebirthmark”.

O seu primeiro LP, gravado e mesturado por Hevi (Malandrómeda) en Laboratorio Soyuz, verá a luz en outubro de 2019.