GalicianTunes: Artista

GALEGO
ESPAÑOL
ENGLISH

Ruxe Ruxe

Ruxe Ruxe é sen dúbida a banda referente do rock galego. Con 23 anos de traxectoria, 11 LPs no mercado e máis de duascentas cancións orixinais publicadas, están no seu mellor momento. Con enerxías renovadas, en febreiro de 2020 presentan o seu novo disco, «O estraño falar dun monstro da aldea» (2020), gravado nos Estudios Garate de Andoain (Guipúscoa) con Kaki Arkarazo.

Ruxe Ruxe é por méritos propios unha das bandas galegas máis lendarias, movéndose á marxe dos grandes poderes da cultura, das modas e do políticamente correcto. Co espírito de loita por bandeira, do rock do país, do rock libre e de combate, do realismo máxico e do corpo a corpo sincero, directo e emocional, a esencia do ADN dos Ruxe Ruxe queda patente en cada disco editado e en cada concerto que deron desde os seus inicios no ano 96.

Ruxe Ruxe foi, é e será unha banda de culto. As súas cancións son banda sonora en películas, anuncios de TV e programas deportivos, e xa forman parte da memoria colectiva dunha parroquia de galegos e galegas que sempre lles agasalla o seu cariño, admiración e respecto.

Tocaron en incontables festivais do país e fixeron xiras que os levaron ininterrumpidamente polos mellores escenarios, tamén alén das nosas fronteiras e sempre con moi boa acollida tanto polo público como pola crítica. Colaboraron con bandas como Boikot ou Siniestro Total e teñen compartido palco con Molotov, Gwendal, Wolfstone, Status Quo, Reincidentes ou Def con Dos, entre outros.