GalicianTunes: Artista - Grupo de Música Antiga 1500

GALEGO
ESPAÑOL
ENGLISH

Grupo de Música Antiga 1500

O grupo 1500 é unha formación vocal e instrumental dedicada á interpretación da música antiga. O seu repertorio abrangue desde a música composta nos séculos centrais e finais da Idade Media, ata a música do Renacemento e primeiro Barroco, tomando como referente central o ano 1500. Os e as compoñentes de 1500 contan cunha ampla traxectoria concertística, sendo membros ou colaborando con outras formacións de ámbito nacional e internacional, e teñen ofrecido numerosos concertos en Galicia, España e no resto de Europa. Na interpretación e elaboración dos diferentes programas, o grupo busca o máximo rigor histórico e conceptual, e emprega un amplo repertorio de instrumentos medievais e renacentistas. Ademáis da súa actividade concertística, o grupo de Música Antiga 1500 desenvolve outro tipo de proxectos relacionados coa música, desde a súa concepción e deseño, ata a súa execución: bandas sonoras para audiovisuais e teatro, concertos, guías e materiais didácticos para as diferentes etapas do ensino, recitais de poesía e música e concertos monográficos de temática específica para diversas conmemoracións. Desde a súa creación, o grupo ten ofrecido numerosos concertos: Festival Espazos Sonoros, Festa da Istoria de Rivadabia, Músicas na Compañía, Ciclo de órgano de Xunqueira de Ambía, Semana Santa de Foz, Semana Santa de Ourense, Centenario de San Rosendo en 2006, Museo de Belas Artes da Coruña, Músicas da Itinerancia, Música nas Ruínas de Pontevedra, entre outros.